ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ກັບ ຄູ່ຮ່ວມເຈລະຈາອາຊຽນ.
ໃນວັນທີ 26 ກໍລະກົດ 2024 ທີ່ ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ, ພ້ອມທັງ ນໍາພາຄະນະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ກັບ ບັນດາປະເທດຄູ່ເຈລະຈາ, ຊຶ່ງປະກອບດ້ວຍ: ກອງປະຊຸມລັດຖະມົນຕີຕ່າງປະເທດ ລະຫວ່າງອາຊຽນ ກັບ ສປ.ຈີນ, ນິວຊີແລນ, ຍີ່ປຸ່ນ, ອີຢູ, ສ.ເກົາຫຼີ, ອິນເດຍ, ລັດເຊຍ, ອັງກິດ, ສ. ອາເມລິກາ ແລະ ການາດາ, ຕາມລໍາດັບ. ໃນວັນດຽວກັນ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ເປັນປະທານກອງປະຊຸມສາມຝ່າຍ ລະຫວ່າງ ສປປ ລາວ, ກອງເລຂາອາຊຽນ ແລະ ຕວັກກີ ອີກດ້ວຍ.
![](https://www.laoschairmanship2024.gov.la/wp-content/uploads/2024/07/Aus-1024x576.jpg)
ໃນຖານະທີ່ ສປປ ລາວ ເປັນປະເທດປະສານງານການພົວພັນຮ່ວມມືອາຊຽນ-ອົດສະຕຣາລີ (2021-2024), ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ເປັນປະທານກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ຮ່ວມກັບ ທ່ານ ນາງ ເພັນນີ ວອງ (Penny Wong), ລັດຖະມົນຕີຕ່າງປະເທດອົດສະຕຣາລີ. ກອງປະຊຸມ ໄດ້ສະແດງຄວາມຍິນດີຕໍ່ຜົນສໍາເລັດຂອງກອງປະຊຸມສຸດຍອດ ສະໄໝພິເສດ ເພື່ອສະເຫຼີມສະຫຼອງການພົວພັນຮ່ວມມືອາຊຽນ-ອົດສະຕຣາລີ ຄົບຮອບ 50 ປີ, ຊຶ່ງໄດ້ຈັດຂຶ້ນໃນວັນທີ 4 ມີນາ 2024 ທີ່ ເມວເບີນ, ອົດສະຕຣາລີ. ໃນນີ້, ກອງປະຊຸມ ໄດ້ຢໍ້າຄືນຄວາມໝາຍໝັ້ນໃນການຈັດຕັ້ງຜັນຂະຫຍາຍ 2 ເອກະສານຜົນກອງປະຊຸມດັ່ງກ່າວ ໃຫ້ເປັນຮູບປະທໍາ ເພື່ອນໍາຜົນປະໂຫຍດອັນແທ້ຈິງມາສູ່ອາຊຽນ ແລະ ອົດສະຕຣາລີ. ພິເສດ, ກອງປະຊຸມ ໄດ້ຮັບຮອງເອົາແຜນປະຕິບັດງານອາຊຽນ-ອົດສະຕຣາລີ ສະບັບໃໝ່ (2025-2029) ເພື່ອຮັດແໜ້ນເປັນຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ ໃນຕໍ່ໜ້າ. ນອກນີ້, ກອງປະຊຸມ ຍັງໄດ້ຊຸກຍູ້ໃຫ້ສໍາເລັດການເຈລະຈາ ເພື່ອສ້າງຕັ້ງສູນອາຊຽນ-ອົດສະຕຣາລີ ໂດຍໄວ. ໃນໂອກາດນີ້, ສປປ ລາວ ໄດ້ມອບບົດບາດການເປັນປະເທດປະສານງານສໍາລັບການຮ່ວມມືອາຊຽນ-ອົດສະຕຣາລີ ໃຫ້ແກ່ ອິນໂດເນເຊຍ.
![](https://www.laoschairmanship2024.gov.la/wp-content/uploads/2024/07/China-1024x576.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ໄດ້ສະແດງຄວາມຍິນດີຕໍ່ການປະກາດປີ 2024 ເປັນປີແຫ່ງການໄປມາຫາສູ່ລະຫວ່າງປະຊາຊົນ ກັບ ປະຊາຊົນ ອາຊຽນ-ຈີນ ແລະ ໄດ້ຊຸກຍູ້ການຈັດຕັ້ງຜັນຂະຫຍາຍບັນດາໂຄງການ ແລະ ກິດຈະກໍາສໍາລັບປີດັ່ງກ່າວ ໃຫ້ເປັນຮູບປະທໍາ ໂດຍກວມເອົາຫຼາຍຂົງເຂດ ເຊັ່ນ: ການສຶກສາ, ການແລກປ່ຽນທາງດ້ານວັດທະນະທໍາ, ການຈັດຝຶກອົບຮົມ ແລະ ການທ່ອງທ່ຽວ. ພ້ອມນີ້, ກອງປະຊຸມຍັງໄດ້ຮັບຊາບ 6 ຂໍ້ສະເໜີ ແລະ ກິດຈະກໍາຂອງ ສປ.ຈີນ ສໍາລັບປີ 2024 ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານ ໃຫ້ເປັນຮູບປະທໍາ. ພິເສດ ກອງປະຊຸມ ໄດ້ຮັບຮອງເອົາຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ຈີນ ວ່າດ້ວຍ ການຮັດແໜ້ນການຮ່ວມມືດ້ານການເກັບກູ້ລະເບີດເພື່ອມະນຸດສະທໍາ.
![](https://www.laoschairmanship2024.gov.la/wp-content/uploads/2024/07/NZ-1024x683.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ ໄດ້ສະໜັບສະໜູນຂໍ້ສະເໜີຂອງ ນິວຊີແລນ ເພື່ອຈັດກອງປະຊຸມສຸດຍອດ ເພື່ອສະເຫຼີມສະຫຼອງການພົວພັນຮ່ວມມືອາຊຽນ-ນິວຊີແລນ ຄົບຮອບ 50 ປີ ໃນທ້າຍປີ 2025 ທີ່ ມາເລເຊຍ, ພ້ອມທັງເຫັນດີເຮັດວຽກຮ່ວມກັນ ເພື່ອປຶກສາຫາລືລາຍລະອຽດ ກ່ຽວກັບກະກຽມໃຫ້ແກ່ກອງປະຊຸມສຸດຍອດສະໄໝພິເສດດັ່ງກ່າວ. ພ້ອມນີ້, ກອງປະຊຸມ ຍັງໄດ້ຮັບຊາບເຈດຈໍານົງຂອງ ນິວຊີແລນ ໃນການສະເໜີຍົກລະດັບການພົວພັນຮ່ວມມື ຂຶ້ນເປັນຄູ່ຮ່ວມຍຸດທະສາດຮອບດ້ານ ກັບອາຊຽນ.
![](https://www.laoschairmanship2024.gov.la/wp-content/uploads/2024/07/JP-1024x576.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ໄດ້ຊຸກຍູ້ການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດ ເພື່ອສະເຫຼີມສະຫຼອງການພົວພັນອາຊຽນ-ຍີ່ປຸ່ນ ຄົບຮອບ 50 ປີ ທີ່ໄດ້ຈັດຂຶ້ນໃນເດືອນທັນວາ ປີ 2023 ທີ່ ໂຕກຽວ,ຍີ່ປຸ່ນ. ນອກນັ້ນ, ກອງປະຊູມ ໄດ້ຊຸກຍູ້ການເລັ່ງລັດການເຈລະຈາການສ້າງຕັ້ງສູນອາຊຽນ ເພື່ອຮັບມືກັບພາວະສຸກເສີນດ້ານສາທາລະນະສຸກ ແລະ ພະຍາດລະບາດ ເພື່ອຮັບປະກັນໃຫ້ມີໂຄງສ້າງພື້ນຖານດ້ານສາທາລະນະສຸກທີ່ມີປະສິດທິພາບພາຍໃນພາກພື້ນ.
![](https://www.laoschairmanship2024.gov.la/wp-content/uploads/2024/07/EU1-1-1024x683.jpg)
![](https://www.laoschairmanship2024.gov.la/wp-content/uploads/2024/07/EU2-1024x683.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ອີຢູໄດ້ປຶກສາຫາລື ກ່ຽວກັບການຈັດຕັ້ງຜັນຂະຫຍາຍຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ທີ່ໄດ້ຮັບຮອງໃນເດືອນກຸມພາ 2024 ຜ່ານມາ ແລະ ໄດ້ເຫັນດີຮັດແໜ້ນການຮ່ວມມື ຜ່ານການຈັດຕັ້ງປະຕິບັດໂຄງການພາຍໃຕ້ກົນໄກການຮ່ວມມືອາຊຽນ-ອີຢູ ໂດຍສະເພາະ ໃນຂົງເຂດການເຊື່ອມຈອດພາກພື້ນ, ການຄ້າ-ການລົງທຶນ, ການໄປມາຫາສູ່ກັນລະຫວ່າງປະຊາຊົນ, ສິ່ງແວດລ້ອມ ແລະ ການປ່ຽນແປງດິນຟ້າອາກາດ ເປັນຕົ້ນ.
![](https://www.laoschairmanship2024.gov.la/wp-content/uploads/2024/07/ROK-1024x682.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ສ.ເກົາຫຼີ ໄດ້ຕີລາຄາສູງຕໍ່ການພົວພັນຮ່ວມມືອາຊຽນ-ສ.ເກົາຫຼີ ຄົບຮອບ 35 ປີ ແລະ ເຫັນດີຍົກລະດັບການພົວພັນຮ່ວມມືອາຊຽນ-ສ.ເກົາຫຼີ ຂຶ້ນສູ່ລະດັບໃໝ່. ພິເສດ, ກອງປະຊຸມ ໄດ້ເຫັນດີຕໍ່ຮ່າງຖະແຫຼງການຮ່ວມ ເພື່ອສ້າງຕັ້ງການເປັນຄູ່ຮ່ວມມືຍຸດທະສາດຮອບດ້ານອາຊຽນ-ສ. ເກົາຫຼີ ເພື່ອສະເໜີຕໍ່ກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 25 ທີ່ຈະຈັດຂຶ້ນໃນເດືອນຕຸລາ 2024 ເພື່ອຮັບຮອງເອົາ.
![](https://www.laoschairmanship2024.gov.la/wp-content/uploads/2024/07/India-1024x683.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານອາຊຽນ-ອິນເດຍ (2021-2025) ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ອິນເດຍ ແນໃສ່ສົ່ງເສີມການພົວພັນຮ່ວມມືອາຊຽນ-ອິນເດຍ ໃນອະນາຄົດ. ພ້ອມນີ້, ກອງປະຊຸມ ຍັງໄດ້ເຫັນດີຮັດແໜ້ນການຮ່ວມມືທາງດ້ານເສດຖະກິດ, ການເຊື່ອມຈອດ, ການເຊື່ອມຈອດທາງດ້ານດີຈີຕອນ, ການສຶກສາ, ການສ້າງຂີດຄວາມສາມາດໃຫ້ແກ່ບຸກຄະລາກອນ ແລະ ການໄປມາຫາສູ່ລະຫວ່າງປະຊາຊົນ ແລະ ປະຊາຊົນຂອງສອງພາກພື້ນ.
![](https://www.laoschairmanship2024.gov.la/wp-content/uploads/2024/07/Russia-1024x683.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ລັດເຊຍ ໄດ້ຮັບຮອງເອົາຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ລັດເຊຍ ເພື່ອສະເຫຼີມສະຫຼອງການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ຂອງ ລັດເຊຍ ຄົບຮອບ 20 ປີ. ນອກນີ້, ກອງປະຊຸມ ໄດ້ທົບທວນຄືນການພົວພັນຮ່ວມມືອາຊຽນ-ລັດເຊຍ ໃນໄລຍະຜ່ານມາ ໂດຍສະເພາະຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນ-ລັດເຊຍ (2021-2025) ແລະ ໄດ້ກໍານົດທິດທາງໃນການຮັດແໜ້ນການພົວພັນຮ່ວມມືອາຊຽນ-ລັດເຊຍ ໃນຕໍ່ໜ້າ.
![](https://www.laoschairmanship2024.gov.la/wp-content/uploads/2024/07/UK-1024x683.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ໄດ້ທົບທວນຄືນການຮ່ວມມືອາຊຽນ-ອັງກິດ ໂດຍສະເພາະຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນ-ອັງກິດ (2022- 2026) ແລະ ໄດ້ຊຸກຍູ້ໃຫ້ສືບຕໍ່ການຈັດຕັ້ງປະຕິບັດແຜນປະຕິບັດງານດັ່ງກ່າວ ຢ່າງມີປະສິດທິພາບ ແລະ ຄົບຖ້ວນ ໂດຍເນັ້ນໃສ່ຂົງເຂດທີ່ມີຄວາມສົນໃຈຮ່ວມກັນ. ພ້ອມນີ້, ກອງປະຊຸມ ຍັງໄດ້ຮັບຮອງເອົາຖະແຫຼງການຮ່ວມອາຊຽນ-ອັງກິດ ວ່າດ້ວຍການເພີ່ມທະວີການເຊື່ອມຈອດ ເພື່ອອະນາຄົດທີ່ໝັ້ນຄົງ ແລະ ຍືນຍົງ ເພື່ອສົ່ງເສີມການຮ່ວມມືດ້ານການເຊື່ອມໂຍງ ແລະ ເຊື່ອມຈອດ ລະຫວ່າງອາຊຽນ ແລະ ອັງກິດ ໃຫ້ເປັນຮູບປະທໍາ.
![](https://www.laoschairmanship2024.gov.la/wp-content/uploads/2024/07/US-1024x576.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ສ. ອາເມລິກາ ໄດ້ທົບທວນການພົວພັນຮ່ວມມືອາຊຽນ-ສ. ອາເມລິກາ ແລະ ໄດ້ກໍານົດທິດທາງໃນການຮັດແໜ້ນການຮ່ວມ ອາຊຽນ-ສ. ອາເມລິກາ ໃນຕໍ່ໜ້າ ໂດຍເນັ້ນໃສ່ຂົງເຂດການຮ່ວມມືໃໝ່ ເປັນຕົ້ນແມ່ນ ການຫັນປ່ຽນທາງດ້ານດີຈີຕອນ, ເຕັກໂນໂລຊີ ແລະ ປັນຍາປະດິດ. ພ້ອມນີ້, ກອງປະຊຸມ ຍັງໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ-ສ. ອາເມລິກາ ຄັ້ງທີ 12 ທີ່ຈະຈັດຂຶ້ນໃນເດືອນ ຕຸລາ 2024 ນີ້ [ໂດຍສະເພາະ ຄວາມຄືບໜ້າຂອງການຮ່າງຖະແຫຼງການຜູ້ນໍາອາຊຽນ-ສ. ອາເມລິກາ ວ່າດ້ວຍ ການສົ່ງເສີມປັນຍາປະດິດ ທີ່ປອດໄພ, ໝັ້ນຄົງ ແລະ ເຊື່ອຖືໄດ້].
![](https://www.laoschairmanship2024.gov.la/wp-content/uploads/2024/07/Canada-1024x576.jpg)
ກອງປະຊຸມລັດຖະມົນຕີຕ່າງປະເທດອາຊຽນ-ການາດາ [ໄດ້ເຫັນດີຕໍ່ຂໍ້ສະເໜີຂອງ ການາດາ ເພື່ອຈັດກອງປະຊຸມສຸດຍອດອາຊຽນ-ການາດາ ສະໄໝພິເສດ ວ່າດ້ວຍເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ ໃນເດືອນຕຸລາ 2024 ທີ່ ນະຄອນຫຼວງວຽງຈັນ.] ພ້ອມນີ້, ສອງຝ່າຍ ຍັງໄດ້ເຫັນດີໃຫ້ມີການສ້າງແຜນປະຕິບັດງານອາຊຽນ-ການາດາ (2026-2030) ສະບັບໃໝ່ ເພື່ອປ່ຽນແທນແຜນປະຕິບັດງານສະບັບເກົ່າ ທີ່ຈະສິ້ນສຸດ ໃນທ້າຍປີ 2025 ນີ້. ໃນໂອກາດນີ້, ສປປ ລາວ ໄດ້ຮັບກຽດເປັນປະເທດປະສານງານສໍາລັບການຮ່ວມມືອາຊຽນ-ການາດາ ຈົນເຖິງປີ 2027.
![](https://www.laoschairmanship2024.gov.la/wp-content/uploads/2024/07/Tri-Turkey-1024x576.jpg)
ກອງປະຊຸມສາມຝ່າຍ ລະຫວ່າງປະທານອາຊຽນ, ເລຂາທິການໃຫຍ່ອາຊຽນ ແລະ ຕວັກກີ ໄດ້ສະແດງຄວາມຍິນດີຕໍ່ການຮັບຮອງເອົາແຜນປະຕິບັດງານສະບັບໃໝ່ ສໍາລັບສົກປີ 2024-2028 ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດ ແລະ ການເສີມຂະຫຍາຍການເປັນຄູ່ຮ່ວມຂະແໜງການອາຊຽນ-ຕວັກກີ ໃນຕໍ່ໜ້າ. ນອກນີ້, ກອງປະຊຸມ ຍັງໄດ້ຮ່ວມກັນກໍານົດທິດທາງການຮ່ວມມືໃນຕໍ່ໜ້າ ໂດຍເນັ້ນໃສ່ບັນດາຂົງເຂດບູລິມະສິດ ເປັນຕົ້ນແມ່ນ ການຄ້າ-ການລົງທຶນ, ການຫຼຸດຜ່ອນຄວາມແຕກໂຕນດ້ານການພັດທະນາ, ການສຶກສາ ແລະ ການພັດທະນາບຸກຄະລາກອນ ພ້ອມທັງຊຸກຍູ້ໃຫ້ມີການແລກປ່ຽນ ແລະ ການໄປມາຫາສູ່ລະຫວ່າງປະຊາຊົນຫຼາຍຍິ່ງຂຶ້ນ.